لاہور: (رائیٹ ناؤ نیوز) تھانہ ٹاؤن شپ میں دو خواتین کی اچانک ہلاکت نے پولیس کو مشکل میں ڈال دیا ہے۔ سی سی پی او بلال صدیق کمیانہ نے بتایا کہ دونوں خواتین کی موت کا معمہ حل کرنے کے لئے تحقیقات جاری ہیں۔

پریس کانفرنس میں سی سی پی او نے بتایا کہ 4 اگست کو یہ واقعہ پیش آیا، جب دو خواتین کی موت نے پولیس کو حیران کر دیا۔ پوسٹ مارٹم رپورٹ میں تشدد کی تصدیق نہیں ہوئی، فارنزک رپورٹ کا انتظار ہے۔

حکام نے کہا کہ 4 اگست کو پولیس کو نوسر بازی کی اطلاع ملی تھی، پولیس نے بروقت کارروائی کرتے ہوئے خواتین کو تھانے منتقل کیا۔ ایف آئی آر بھی درج کی گئی۔

سی سی پی او نے کہا کہ خواتین کو انویسٹیگیشن کے دوران طبیعت خراب ہونے پر اسپتال منتقل کیا گیا، جہاں ان کی موت کی تصدیق کی گئی۔ سی سی ٹی وی کیمروں میں تشدد کے کوئی شواہد نہیں ملے ہیں۔

واضح رہے کہ پولیس نے خواتین کی شناخت نہ ہونے کی وجہ سے پوسٹ مارٹم میں تاخیر کی، فارنزک رپورٹ میں موت کی وجہ سامنے آئے گی۔ پولیس نے خواتین کے تھانے آنے کے قواعد و ضوابط پر بھی زور دیا ہے۔