لندن: (رائیٹ ناؤ نیوز) کیمبرج یونیورسٹی کے کم عمر ترین سیاہ فام پروفیسر جیسن آرڈے نے تحقیقی کام میں سرقہ کے الزامات پر استعفیٰ دے دیا ہے۔ یونیورسٹی نے تصدیق کی ہے کہ جیسن کا استعفیٰ فوری نافذ العمل ہوگیا ہے اور الزامات کی تحقیقات جاری ہیں۔

جیسن آرڈے 2023 میں 37 سال کی عمر میں کیمبرج میں پروفیسر بنے تھے۔ ان کی زندگی کی داستان نے دنیا بھر میں شہرت حاصل کی، کیونکہ انہوں نے بچپن میں آٹزم اور دیگر مشکلات پر قابو پایا تھا۔

جولائی 2026 میں سابق کیمبرج محقق نیتھن کوفناس نے جیسن کے پی ایچ ڈی مقالے میں دیگر محققین کے کام سے مماثلت کے دعوے کیے۔ مختلف تجزیوں نے بھی کئی حصوں میں مشابہت کی نشاندہی کی۔

تحقیقات صرف تحقیقی مقالوں تک محدود نہیں رہیں بلکہ جیسن کی تعلیمی اور پیشہ ورانہ سوانح میں کیے گئے بعض دعوؤں پر بھی سوالات اٹھائے گئے ہیں۔ ان کے بعض سابقہ اداروں نے ان کے اعزازی عہدوں کی تصدیق نہیں کی۔

واضح رہے کہ جیسن آرڈے کے پی ایچ ڈی مقالے پر پہلے بھی نقل کے الزامات لگ چکے تھے، لیکن اس وقت لیورپول یونیورسٹی نے انہیں غیر ارادی غلطیاں قرار دیا تھا۔