اسلام آباد: (رائیٹ ناؤ نیوز) نیپرا نے جون کے ماہانہ فیول ایڈجسٹمنٹ کی مد میں بجلی کے نرخ میں 75 پیسے فی یونٹ اضافے کی منظوری دے دی ہے۔ یہ اضافہ کے الیکٹرک سمیت ملک بھر کے تمام صارفین پر لاگو ہوگا۔ اضافی رقم اگست کے بجلی کے بلوں میں صارفین سے وصول کی جائے گی۔

نیپرا کے مطابق جون 2026 کے اصل فیول چارجز 8.4641 روپے فی یونٹ جبکہ ریفرنس فیول چارجز 7.7138 روپے فی یونٹ تھے، جس کی بناء پر یہ اضافہ کیا گیا۔ سینٹرل پاور پرچیزنگ ایجنسی نے ایک روپے 20 پیسے فی یونٹ اضافے کی درخواست کی تھی۔

نیپرا نے درخواست پر سماعت کے بعد فیصلہ محفوظ کیا اور ڈیٹا کی جانچ پڑتال کے بعد نوٹیفکیشن جاری کر دیا گیا۔ نوٹیفکیشن کے مطابق لائف لائن صارفین، پری پیڈ صارفین اور الیکٹرک وہیکل چارجنگ اسٹیشنز کو اس اضافے سے مستثنیٰ قرار دیا گیا ہے۔

یہ اضافی بوجھ عام صارفین کے ماہانہ بجلی کے بلوں میں اضافہ کا باعث بنے گا، جس سے ان کی مالی مشکلات بڑھ سکتی ہیں۔

یاد رہے کہ پچھلے ماہ بھی فیول ایڈجسٹمنٹ کی مد میں اضافے کا اعلان کیا گیا تھا، جس کا اثر صارفین پر پڑا تھا۔