میڈرڈ: (رائیٹ ناؤنیوز) اسپین نے مراکش کے ساتھ سیوٹا شہر کی سرحد پر امن بحال کرنے کے لیے فوج تعینات کرنے کا اعلان کیا ہے۔ ہزاروں تارکین وطن غیر قانونی طور پر شہر میں داخل ہوچکے ہیں اور اس کوشش میں کم از کم 9 افراد ہلاک ہوئے ہیں۔

یہ اعلان اس وقت کیا گیا جب سیوٹا میں مقامی حکام نے مرکزی حکومت سے مدد کی درخواست کی۔ مراکش سے لوگوں کا ایک بڑا ہجوم سرحدی باڑ کو توڑ کر اسپین میں داخل ہوا ہے۔

اسپین کی حکومت نے کہا ہے کہ سیکورٹی کو برقرار رکھنے کے لیے مسلح افواج کو سول گارڈ کے ساتھ سیوٹا بھیجا جائے گا۔ وزیر اعظم پیڈرو سانچیز اور وزیر داخلہ فرنانڈو گرانڈے جمعہ کو سیوٹا کا دورہ کریں گے۔

سول گارڈ افسران کی نمائندگی کرنے والی ایسوسی ایشن کے سربراہ نے کہا کہ صورتحال مکمل افراتفری کا شکار ہے۔ انہوں نے بتایا کہ درست تعداد بتانا ممکن نہیں لیکن ہزاروں تارکین وطن سرحد پار کر رہے ہیں۔

واضح رہے کہ اسپین اور مراکش کے درمیان تعلقات میں حالیہ برسوں میں تناؤ بڑھا ہے، جس کی وجہ سے سرحدی سیکورٹی کے مسائل پیدا ہوئے ہیں۔