تہران: (رائیٹ ناؤ نیوز) پاکستان کے تعاون سے ایران میں کرکٹ کے فروغ کے لئے اہم اقدامات کا اعلان کیا گیا ہے۔ ایشین کرکٹ کونسل اور پی سی بی کی جانب سے ایران میں کھیل کی ترقی کے لئے عملی مدد فراہم کی جائے گی۔

پاکستان-ایران کرکٹ ایسوسی ایشن کے صدر حسین مختاری کی پی سی بی کے چیئرمین محسن نقوی سے ملاقات میں یہ اصولی فیصلہ کیا گیا۔ ملاقات میں کرکٹ تعلقات کو مضبوط بنانے پر تبادلہ خیال ہوا۔

ذرائع کے مطابق، کرکٹ کے تکنیکی شعبوں میں تعاون، کوچز اور امپائرز کی تربیت پر زور دیا گیا ہے۔ کھلاڑیوں کی صلاحیتوں میں اضافے کے لئے بھی اقدامات کئے جائیں گے۔

پاکستان کرکٹ بورڈ اور ایشین کرکٹ کونسل کے تعاون سے ایران میں کرکٹ کی ترقی کو تیز کرنے کے اقدامات پر توجہ مرکوز کی گئی ہے۔ اس سے ایران میں کرکٹ کا معیار بہتر ہوگا۔

یاد رہے کہ ایران میں کرکٹ کا کھیل ابھی ابتدائی مراحل میں ہے اور پاکستان کے تعاون سے اس کی ترقی کے لئے بڑی توقعات وابستہ ہیں۔