آزاد کشمیر: (رائیٹ ناؤنیوز) چیف الیکشن کمشنر جسٹس (ر) غلام مصطفیٰ مغل نے کہا ہے کہ عوام کو چاہیے کہ وہ اپنے گھروں سے نکل کر ووٹ ڈالیں۔ جمہوری عمل میں شرکت ہی مسائل کے حل کی ضمانت ہے۔

چیف الیکشن کمشنر نے میڈیا سے گفتگو کرتے ہوئے کہا کہ اگر عوام گھروں میں بیٹھے رہیں گے تو مسائل حل نہیں ہوں گے۔ ووٹ کا درست استعمال عوام کو اپنے نمائندے منتخب کرنے کا موقع فراہم کرتا ہے۔

غلام مصطفیٰ مغل نے کہا کہ الیکشن کمیشن شفاف اور پرامن انتخابات کے لیے تمام ضروری انتظامات مکمل کر رہا ہے۔ سیکیورٹی اہلکار بھی مختلف صوبوں سے تعینات کیے جا رہے ہیں۔

انہوں نے بتایا کہ ووٹرز کے تحفظ کے لیے مسلح افواج کی کوئیک رسپانس فورس الرٹ رہے گی۔ انتہائی حساس پولنگ اسٹیشنز پر سیکیورٹی اہلکاروں کی تعداد بڑھا دی گئی ہے۔

یاد رہے کہ آزاد کشمیر قانون ساز اسمبلی کے انتخابات کے پہلے مرحلے کی پولنگ مکمل ہو چکی ہے۔ دوسرے مرحلے کے انتخابات 2 اگست کو مظفرآباد میں ہوں گے۔