اسلام آباد: (رائیٹ ناؤ نیوز) وزیراعظم آفس میں مصنوعی ذہانت پر مبنی جدید ٹریکنگ اور فیصلہ سازی کے نظام کا افتتاح ہوگیا۔ وزیراعظم شہباز شریف نے مکمل عملدرآمد کی ہدایت کرتے ہوئے کہا کہ اب کوئی روایتی فائل نظام نہیں ہوگا۔

وزیراعظم آفس میں جدید مصنوعی ذہانت اور ڈیٹا پر مبنی نظام فعال کردیا گیا ہے جس سے فیصلہ سازی کا عمل تیز ہوگا۔ وفاقی وزیر احد چیمہ نے بریفنگ دیتے ہوئے کہا کہ وزیراعظم کی ہدایت پر جدید ٹیکنالوجی کا استعمال بڑھایا جا رہا ہے۔

وفاقی وزیر آئی ٹی شزا فاطمہ نے بتایا کہ ڈیجیٹائزیشن کے عمل کو آگے بڑھاتے ہوئے پیپر لیس طرز حکمرانی کی طرف جا رہے ہیں۔ انہوں نے کہا کہ اس نظام سے حکومت کی کارکردگی میں بہتری آئے گی۔

نئے نظام کی بدولت خود کار احتسابی نظام بھی فعال ہوگا، جس سے شفافیت میں اضافہ ہوگا۔ وزیراعظم نے کہا کہ آج کے بعد کوئی بھی شخص فائل ہاتھ میں اٹھا کر دفتر نہیں آئے گا۔

یاد رہے کہ حالیہ برسوں میں حکومت نے مصنوعی ذہانت اور ڈیجیٹائزیشن کے عمل کو فروغ دینے کی کوششیں تیز کردی ہیں تاکہ نظام کو مزید مؤثر بنایا جا سکے۔