سان فرانسسکو: (رائیٹ ناؤنیوز) ویڈیو شیئرنگ پلیٹ فارم یوٹیوب نے ناظرین کی سہولت کے لیے مونیٹائزیشن پالیسی میں اہم تبدیلیاں کی ہیں۔ ان تبدیلیوں کا مقصد غیر معیاری اور مصنوعی ذہانت سے تیار کردہ مواد کی حوصلہ شکنی کرنا ہے۔

نئے قوانین کے مطابق یوٹیوب نے مصنوعی ذہانت کے استعمال پر مکمل پابندی نہیں لگائی۔ تاہم غیر مستند اور خودکار ویڈیوز جو صرف پیسے کمانے کے لیے بنائی جاتی ہیں، ان کی کمائی روک دی جائے گی۔

مصنوعی مواد کی تین اقسام کو مونیٹائز نہیں کیا جائے گا، جیسے کہ مصنوعی ذہانت سے تیار کردہ ویڈیوز، سنسنی خیز مواد، اور حساس موضوعات پر مشورے۔ یوٹیوب کے چیف آف ٹرسٹ اینڈ سیفٹی نے کہا کہ کمپنی غیر معیاری مواد کے خلاف سخت اقدام کر رہی ہے۔

یہ پالیسی اپ ڈیٹ یوٹیوب کے لیے تجارتی لحاظ سے اہم ہے کیونکہ یہ روایتی ٹی وی نیٹ ورکس اور نیٹ فلکس جیسے ویڈیو پلیٹ فارمز کے ساتھ مقابلہ کر رہا ہے۔ یوٹیوب نے غیر معیاری مواد سے بچنے کے لیے یہ قدم اٹھایا ہے تاکہ ناظرین کی دلچسپی برقرار رہے۔

یاد رہے کہ یوٹیوب نے اپنی نئی پالیسی کے ذریعے ویڈیوز بنانے والوں کو انسانی تخلیقیت اور اصلیت پر زور دینے پر مجبور کیا ہے۔ غیر معیاری ویڈیوز کی بنا پر تخلیق کاروں کو کمائی کے پروگرام سے باہر کیا جا سکتا ہے۔