اینڈی برنہم نے غزہ جنگ پر لیبر پارٹی کے مؤقف پر افسوس کا اظہار کیا ہے، جس سے برطانیہ کی سیاست میں تبدیلی کی نشاندہی ہوتی ہے۔
لندن: (رائیٹ ناؤ نیوز) برطانیہ کی لیبر پارٹی کے سینئر رہنما اینڈی برنہم نے غزہ میں اسرائیلی کارروائیوں پر اپنی جماعت کے مؤقف پر افسوس کا اظہار کیا ہے۔ انہوں نے کہا کہ لیبر پارٹی عوام کی توقعات پر پوری نہیں اتری۔
برنہم نے برطانوی اخبار کو دیے گئے انٹرویو میں کہا کہ غزہ میں اسرائیلی کارروائیوں پر لیبر پارٹی کا ابتدائی مؤقف مناسب نہیں تھا۔ انہوں نے اس پر معذرت بھی کی۔
اینڈی برنہم نے مزید کہا کہ غزہ میں جنگی جرائم کے شواہد بڑھ رہے ہیں مگر انہوں نے اسرائیلی کارروائیوں کو نسل کشی کہنے سے گریز کیا ہے۔
انہوں نے کہا کہ غزہ میں اقدامات کی قانونی حیثیت کا فیصلہ بین الاقوامی عدالتوں کو کرنا چاہیے، سیاست دانوں کو نہیں۔
واضح رہے کہ غزہ جنگ کے آغاز پر لیبر پارٹی کو اندرون ملک شدید تنقید کا سامنا کرنا پڑا تھا۔ موجودہ وزیراعظم کیئر اسٹارمر نے اسرائیل کی حمایت میں بیان دیا تھا۔
