گلگت بلتستان: (رائیٹ ناؤنیوز) چیف الیکشن کمشنر گلگت بلتستان راجہ شہباز خان نے عوام سے پرامن طریقے سے انتخابات کو مکمل کرنے کی اپیل کی ہے۔ انہوں نے کہا کہ پولنگ کا عمل صبح 8 بجے سے جاری ہے اور ووٹرز کی بھرپور شرکت دیکھی جا رہی ہے۔

مختلف پولنگ اسٹیشنز کے دورے کے بعد راجہ شہباز خان نے بتایا کہ عوام انتخابی عمل میں دلچسپی لے رہے ہیں۔ خواتین ووٹرز بھی لیڈیز پولنگ اسٹیشنز پر ووٹ کاسٹ کرنے آ رہی ہیں۔

چیف الیکشن کمشنر نے کہا کہ ووٹرز کی سہولت اور حفاظت کے لیے بہترین انتظامات کیے گئے ہیں۔ انتخابی عمل کو شفاف، آزادانہ اور پرامن ماحول میں یقینی بنایا جا رہا ہے۔

انہوں نے عوام سے اپیل کی کہ وہ پرامن انداز میں انتخابی عمل کو کامیاب بنائیں اور جمہوری ذمہ داری کا مظاہرہ کریں۔

یاد رہے کہ گلگت بلتستان انتخابات کے دوران پولنگ اسٹیشنز کے اندر موبائل فون لے جانے پر پابندی عائد ہے تاکہ شفافیت کو یقینی بنایا جا سکے۔