اسلام آباد: (رائیٹ ناؤ نیوز) مالی سال 26 کے پہلے 10 ماہ میں پاکستانی فری لانسرز کی برآمدی آمدنی 95 کروڑ 90 لاکھ ڈالر تک پہنچ گئی ہے۔ اس ترقی کی وجہ آئی ٹی سیکٹر میں کی گئی حکومتی پالیسی اور مالیاتی اصلاحات ہیں۔

ایس آئی ایف سی کے قیام کے بعد آئی ٹی برآمدات اور فری لانسنگ کے فروغ کیلئے کاروبار دوست ماحول فراہم کیا گیا۔ اس اقدام سے پچھلے تین سالوں میں آئی ٹی سیکٹر میں نمایاں ترقی ہوئی ہے۔

ایس آئی ایف سی کی معاونت سے ایکسپورٹرز کے فارن کرنسی اکاؤنٹس میں رقوم برقرار رکھنے کی حد بڑھائی گئی ہے۔ اس سے آئی ٹی ایکسپورٹرز کو اپنی فارن کرنسی آمدنی کے بہترین استعمال میں آزادی ملی ہے۔

فارن کرنسی اکاؤنٹس پر ریگولیٹری پابندیوں میں نرمی اور خصوصی ڈیبٹ کارڈز کے اجرا سے عالمی ادائیگیاں آسان ہو گئی ہیں۔ نئے بینکاری فریم ورک نے فری لانسرز کیلئے اکاؤنٹ کھولنے کے عمل کو بھی سادہ کر دیا ہے۔

یاد رہے کہ یہ اقدامات آئی ٹی برآمدات بڑھانے اور زیادہ زرمبادلہ ملک میں لانے کیلئے کیے گئے تھے۔ ان اقدامات کی بدولت مالی سال 26 کے پہلے 10 ماہ میں پاکستانی فری لانسرز کی برآمدی آمدنی میں نمایاں اضافہ ہوا ہے۔