واشنگٹن: (رائیٹ ناوٴ نیوز)۔ امریکی صدر ڈونلڈ ٹرمپ نے ایران کے خلاف طویل المدتی بحری ناکہ بندی کی ہدایت دی ہے۔ انہوں نے اپنے مشیروں کو ایران کی معیشت اور تیل کی برآمدات پر دباؤ برقرار رکھنے کا کہا ہے۔

امریکی سینٹ کام کے ترجمان کے مطابق اس ناکہ بندی سے ایران کی سمندری تجارت متاثر ہوئی ہے۔ امریکی افواج ایران آنے جانے والی تجارت کو روک رہی ہیں، جس سے چاہ بہار بندرگاہ پر جہازوں کی تعداد میں اضافہ ہوا ہے۔

ایران نے امریکی ناکہ بندی کی مذمت کرتے ہوئے اسے سمندری قزاقی قرار دیا ہے۔ یو این سیکرٹری جنرل کو بھیجے گئے خط میں ایرانی جہازوں کو روکنے پر احتجاج کیا گیا ہے۔

ایرانی مندوب نے اقوام متحدہ سے مطالبہ کیا ہے کہ امریکی تحویل میں لیے گئے جہازوں کو چھوڑا جائے۔ انہوں نے خبردار کیا کہ امریکی اقدامات سے علاقائی و عالمی سیکیورٹی متاثر ہو سکتی ہے۔

یاد رہے کہ ایران اور امریکہ کے درمیان تعلقات میں کشیدگی کئی دہائیوں سے جاری ہے۔ حالیہ ناکہ بندی کے احکامات سے دونوں ممالک کے درمیان تناؤ مزید بڑھ سکتا ہے۔