واشنگٹن: (رائیٹ ناؤ نیوز) اسرائیلی وزیراعظم بنیامین نیتن یاہو امریکی صدر ڈونلڈ ٹرمپ سے وائٹ ہاؤس میں ملاقات کے لیے پہنچ گئے ہیں۔ یہ ملاقات اس وقت ہو رہی ہے جب امریکا اور ایران کے درمیان حالیہ فوجی کارروائیوں کے بعد عارضی طور پر جنگ بندی ہوئی ہے۔

نیتن یاہو اور ٹرمپ کی ملاقات اوول آفس میں بند کمرے میں ہوگی۔ یہ دونوں رہنماؤں کی جنگ کے بعد پہلی ملاقات ہے۔ ایران کے جوہری پروگرام، لبنان میں حزب اللہ اور علاقائی سیکیورٹی پر تبادلہ خیال متوقع ہے۔

امریکی نشریاتی ادارے کے مطابق نیتن یاہو ایران کی جوہری سرگرمیوں پر نئی معلومات پیش کریں گے۔ ان کا مقصد ٹرمپ کو سخت سفارتی موقف برقرار رکھنے پر قائل کرنا ہے۔

واضح رہے کہ ایران کے خلاف امریکا اور اسرائیل کی مشترکہ کارروائیوں کے بعد دونوں ممالک کے مقاصد میں اختلافات نمایاں ہو چکے ہیں۔ تاہم نیتن یاہو دباؤ برقرار رکھنے کے خواہاں ہیں۔

یاد رہے کہ ٹرمپ اور نیتن یاہو کے تعلقات مضبوط ہیں، مگر ایران جنگ کے بعد امریکا اور اسرائیل میں کچھ معاملات پر اختلافات سامنے آئے ہیں۔