اسلام آباد: (رائیٹ ناوٴ نیوز) ایرانی وزیر خارجہ عباس عراقچی کی مختصر ٹیم کے ساتھ آج رات اسلام آباد آمد متوقع ہے۔ یہ دورہ پاکستانی مصالحتی ٹیم سے اہم بات چیت کے نتیجے میں ہو رہا ہے۔

ذرائع کے مطابق، اس دورے کا مقصد امریکہ اور ایران کے درمیان امن مذاکرات کے دوسرے راؤنڈ کی تیاری ہے۔ امریکی لاجسٹک اور سکیورٹی ٹیم پہلے سے اسلام آباد میں موجود ہے تاکہ اس عمل کی معاونت کی جا سکے۔

حکام کا کہنا ہے کہ دونوں ممالک کے درمیان بات چیت میں خطے کی تازہ صورتحال اور جنگ بندی پر غور کیا گیا ہے۔ عباس عراقچی نے پاکستان کے کردار کو سراہتے ہوئے قریبی رابطے میں رہنے پر اتفاق کیا۔

یہ پیش رفت پاکستانی قیادت کی مسلسل سفارتی کوششوں کا نتیجہ ہے، جو امریکہ اور ایران کے درمیان کشیدگی کم کرنے کے لیے جاری ہیں۔ وزیراعظم اور وزیر خارجہ مختلف ممالک سے رابطے میں مصروف ہیں تاکہ صورتحال کو قابو میں رکھا جا سکے۔

یاد رہے کہ پاکستان نے امریکہ اور ایران کے درمیان کشیدگی کم کرنے کے لیے اہم سفارتی اقدامات کیے ہیں۔ حکومت اس سلسلے میں مزید پیش رفت کے لیے کوشاں ہے۔