واشنگٹن: (رائیٹ ناوٴ نیوز) امریکی صدر ڈونلڈ ٹرمپ نے کہا ہے کہ ایران کی معیشت ناکہ بندی کی وجہ سے متاثر ہو رہی ہے، مگر امریکا کو ڈیل کرنے میں کوئی جلدی نہیں۔

آبنائے ہرمز کی بندش طویل ہوتی جا رہی ہے، اور امریکی صدر نے ناکہ بندی جاری رکھنے کا عندیہ دیا ہے۔ ٹرمپ نے خبردار کیا ہے کہ اگر ایران نے ڈیل نہ کی تو ان کی فوج کارروائی کرے گی۔

صدر ٹرمپ نے ایران کے خلاف جوہری ہتھیاروں کے استعمال کے سوال کو احمقانہ قرار دیا ہے۔ ان کا کہنا ہے کہ ایٹمی ہتھیار کسی کو بھی استعمال نہیں کرنے چاہئیں اور ایران کے خلاف نیوکلیئر ہتھیار استعمال نہیں کریں گے۔

اس سے قبل، صدر ٹرمپ نے امریکی فوج کو آبنائے ہرمز میں بارودی سرنگیں بچھانے والی ایرانی کشتیوں کو تباہ کرنے کا حکم دیا تھا۔ انہوں نے کہا کہ ایران سے معاہدہ صرف امریکا کے مفاد میں اور مناسب وقت پر کیا جائے گا۔

یاد رہے کہ امریکی پابندیوں کی وجہ سے ایران کی معیشت مشکلات کا شکار ہے اور دونوں ممالک کے درمیان کشیدگی بڑھتی جا رہی ہے۔