اسلام آباد: (رائیٹ ناوٴ نیوز)۔ اسلام آباد میں سفارتی سرگرمیاں بڑھ گئی ہیں، جہاں وزیراعظم شہباز شریف سے ایرانی سفیر نے اہم ملاقات کی ہے۔ ملاقات میں خطے کی صورتحال اور امن کے لیے کی جانے والی کوششوں پر گفتگو ہوئی۔

واشنگٹن میں صدر ڈونلڈ ٹرمپ نے پاکستان کی درخواست پر ایران کے ساتھ جنگ بندی کی مدت میں توسیع کا فیصلہ کیا ہے۔ مذاکرات کے لیے امریکہ اور ایران کے وفود کو پاکستان آنا تھا، جو تاحال نہیں پہنچ سکے۔

صدر ٹرمپ نے اپنی دفاعی ٹیم کے ساتھ مشاورت کی، جبکہ نائب صدر جے ڈی وینس کا طیارہ پاکستان روانگی کے لیے تیار تھا۔ امریکی حکام نے ایرانی خاموشی پر پاکستان کے اعلیٰ ثالث فیلڈ مارشل عاصم منیر سے بھی رابطہ کیا۔

امریکی مشیروں کا خیال ہے کہ ایرانی قیادت میں اختلافات ہیں، جو مذاکرات کی ناکامی کا باعث بن رہے ہیں۔ ایران میں یورینیم افزودگی پر اختلافات کے باعث مذاکرات کاروں کو اختیارات دینے پر اتفاق نہیں ہو سکا۔

واضح رہے کہ صدر ٹرمپ نے حملے دوبارہ شروع کرنے کے بجائے جنگ بندی میں توسیع کی ہے تاکہ سفارتی راستہ کھلا رہے۔ ایرانی حکام کے بیانات میں سختی نظر آ رہی ہے، جبکہ ٹرمپ نے پاکستان کی درخواست پر جنگ بندی بڑھانے کی امید ظاہر کی ہے۔