اسلام آباد: (رائیٹ ناوٴ نیوز) وفاقی وزیر توانائی اویس لغاری نے بتایا ہے کہ قطر سے ایل این جی (LNG) کے 4 کارگو 5 دن میں پاکستان پہنچ جائیں گے۔ یہ اعلان انہوں نے ایک ٹی وی پروگرام میں گفتگو کے دوران کیا۔

انہوں نے کہا کہ قطر سے گیس کی آمد کے ساتھ ہی ملک میں جاری بجلی کی لوڈشیڈنگ کا خاتمہ ہوگا۔ ان کے مطابق، فی الوقت لوڈشیڈنگ ایک سے ڈیڑھ گھنٹہ تک محدود ہے۔

ملک بھر میں بجلی کی غیر اعلانیہ لوڈشیڈنگ شدید گرمی کی وجہ سے بڑھ گئی ہے۔ بجلی کا شارٹ فال 4 ہزار میگاواٹ تک پہنچ چکا ہے، جس سے شہری علاقوں میں طویل بندش جاری ہے۔

اویس لغاری نے عوام سے معذرت کی اور بتایا کہ بجلی کی صورتحال میں بہتری کی توقع ہے۔ انہوں نے یقین دلایا کہ آج رات تک بجلی کی فراہمی بہتر ہو جائے گی۔

واضح رہے کہ ملک کے مختلف شہروں میں 10 گھنٹے تک کی لوڈشیڈنگ ہو رہی ہے، کراچی، لاہور، اسلام آباد اور پشاور کے علاقوں میں بجلی کی بندش کی شکایات عام ہیں۔