لاہور: (رائیٹ ناوٴ نیوز) اولمپک گولڈ میڈلسٹ جیولین تھرور ارشد ندیم نے کہا ہے کہ کامن ویلتھ گیمز میں اپنے اعزاز کا دفاع کرنے کے لیے تیار ہوں۔ انہوں نے ایشین گیمز اور ڈائمنڈ لیگز میں بھی شرکت کی تیاری مکمل کر لی ہے۔

ارشد ندیم لاہور میں اپنی ٹریننگ جاری رکھے ہوئے ہیں۔ ان کا کہنا ہے کہ وہ مکمل طور پر فٹ ہیں اور آئندہ آنے والے ایونٹس کے لیے بھرپور تیاری کر رہے ہیں۔ دعا کی درخواست کرتے ہوئے انہوں نے کہا کہ اللہ انہیں فٹ رکھے۔

قطر میں مئی میں شیڈول ڈائمنڈ لیگ ملتوی ہو کر جون میں ہوگی، جس سے ارشد ندیم کو مزید تیاری کا وقت ملا ہے۔ انہوں نے کہا کہ یہ التوا ان کے لیے مفید ثابت ہوا۔

ارشد ندیم کے مطابق جولائی میں کامن ویلتھ گیمز، پھر ڈائمنڈ لیگز، ورلڈ ایتھلیٹکس چیمپئن شپ اور ایشین گیمز ان کے ہدف ہیں۔ وہ ان ایونٹس میں ملک کا نام روشن کرنے کا عزم رکھتے ہیں۔

یاد رہے کہ ارشد ندیم نے مزید کہا کہ پاکستان کی گرمی سے بچنے کے لیے وہ ساؤتھ افریقہ میں ٹریننگ کرنے کی کوشش کر رہے ہیں۔ ان کے کوچ سلمان اقبال بٹ نے بھی اس سال کو چیلنجنگ قرار دیا ہے۔