اسلام آباد: (رائیٹ ناوٴ نیوز) ملک بھر میں بجلی کا شارٹ فال 5 ہزار 726 میگا واٹ تک پہنچ گیا، جس کے باعث عوام شدید لوڈشیڈنگ کا سامنا کر رہے ہیں۔

ذرائع پاورڈویژن کے مطابق ملک میں بجلی کی پیداوار 14 ہزار 274 میگا واٹ ہے جبکہ طلب 20 ہزار میگا واٹ تک ہے۔ پَن بجلی کی پیداوار 1 ہزار 530، تھرمل 7 ہزار 814، سولر 450 اور ونڈ انرجی سے 1 ہزار 490 میگا واٹ بجلی پیدا ہو رہی ہے۔ نیوکلیئر ذرائع سے 2 ہزار 890 میگا واٹ اور بگاس پاور پلانٹس سے 100 میگا واٹ بجلی پیدا کی جا رہی ہے۔

ملک کے شہری اور دیہی علاقوں میں 10 سے 16 گھنٹے کی لوڈشیڈنگ جاری ہے۔ شہری علاقوں میں لوڈشیڈنگ کا دورانیہ 10 سے 12 گھنٹے جبکہ دیہی علاقوں میں 14 گھنٹے تک ہے۔ بجلی چوری والے علاقوں میں لوڈشیڈنگ کا دورانیہ 16 گھنٹے سے زائد ہے۔

بجلی کے شارٹ فال کے باعث عوام کو شدید مشکلات کا سامنا ہے۔ طلب اور پیداوار میں فرق کی وجہ سے شہریوں کو روزمرہ کے کاموں میں رکاوٹوں کا سامنا کرنا پڑ رہا ہے۔

یاد رہے کہ ملک میں بجلی کی قلت کی وجہ سے لوڈشیڈنگ ایک مسلسل مسئلہ رہی ہے اور حکومتی ادارے اس پر قابو پانے کے لئے مختلف اقدامات کر رہے ہیں۔