اسلام آباد: (رائیٹ ناوٴ نیوز) وفاقی حکومت نے مون سون سیزن سے قبل دریاؤں کے حفاظتی بندوں کے سروے کی منظوری دے دی ہے۔ یہ فیصلہ ممکنہ سیلابی صورتحال سے نمٹنے کے لئے حفاظتی اقدامات کو تیز کرنے کی غرض سے کیا گیا ہے۔

عسکری حکام کے خط کے بعد فیڈرل فلڈ کمیشن نے چاروں صوبوں کے محکمہ آبپاشی کو باضابطہ مراسلہ جاری کر دیا ہے۔ مراسلے میں ہدایت کی گئی ہے کہ تمام صوبے حفاظتی بندوں کا مشترکہ سروے کریں اور بندوں میں موجود نقائص کی نشاندہی کرتے ہوئے فوری اصلاحی اقدامات تجویز کریں۔

فیڈرل فلڈ کمیشن نے صوبائی حکام کو ہدایت کی ہے کہ سروے کی بنیاد پر ایک جامع رپورٹ تیار کر کے کمیشن کو ارسال کی جائے۔ اس رپورٹ کی مدد سے بروقت فنڈز کی فراہمی اور مرمتی کام شروع کیا جا سکے گا۔

مراسلے میں واضح کیا گیا ہے کہ تمام تفصیلات اور رپورٹ پندرہ مئی تک جمع کرانا لازمی ہے۔ یہ اقدام اس لیے اہم ہے کہ مون سون سے قبل حفاظتی اقدامات کو حتمی شکل دی جا سکے۔

واضح رہے کہ پاکستان میں ہر سال مون سون سیزن کے دوران سیلاب کا خطرہ رہتا ہے، جس سے بچاؤ کے لئے پیشگی اقدامات ضروری ہیں۔