واشنگٹن: (رائیٹ ناوٴ نیوز) امریکا کے صدر ڈونلڈ ٹرمپ نے کہا ہے کہ ایران کے خلاف جاری جنگ جلد ختم ہونے کے قریب ہے۔ انہوں نے کہا کہ حالات تیزی سے کسی معاہدے کی طرف بڑھ رہے ہیں۔

ٹرمپ نے امریکی نشریاتی ادارے فاکس نیوز کو دیے گئے انٹرویو میں کہا کہ جنگ ختم ہونے کے بہت قریب ہے اور وہ اسے تقریباً ختم سمجھتے ہیں۔ یہ بیان امریکی میڈیا پر نشر ہوا ہے۔

صدر ٹرمپ نے مزید کہا کہ آنے والے دنوں میں صورتحال مزید واضح ہو جائے گی اور ان کے بقول ایران معاہدہ کرنے میں شدید دلچسپی رکھتا ہے۔ انہوں نے کہا کہ ایران بری طرح معاہدہ کرنا چاہتا ہے۔

امریکی صدر نے دعویٰ کیا کہ اگر امریکا ایران کے خلاف جنگ نہ کرتا تو ایران جوہری ہتھیار حاصل کر چکا ہوتا۔ انہوں نے کہا کہ امریکی کارروائیوں نے ایران کے جوہری عزائم کو روکنے میں اہم کردار ادا کیا ہے۔

واضح رہے کہ صدر ٹرمپ کے یہ بیانات ایسے وقت میں آئے ہیں جب خطے میں کشیدگی برقرار ہے، تاہم سفارتی کوششیں جاری ہیں اور ممکنہ جنگ بندی یا معاہدے کی امید کی جا رہی ہے۔