تہران: (رائیٹ ناوٴ نیوز) ایران کی مسلح افواج نے کہا ہے کہ خلیج فارس اور بحیرہ عمان کی بندرگاہیں سب کے لیے یا کسی کے لیے نہیں ہیں۔ ایران نے اپنی سمندری حدود میں خودمختاری کو عوام کا قانونی حق قرار دیا ہے۔

الجزیرہ کے مطابق ایرانی سرکاری نشریاتی ادارے آئی آر آئی بی نے رپورٹ کیا کہ مسلح افواج نے ایران کے قانونی حقوق کے دفاع کو اپنا فطری فرض قرار دیا ہے۔ ایران آبنائے ہرمز کی سیکیورٹی کو یقینی بنائے گا اور دشمن سے وابستہ بحری جہازوں کو گزرنے کا حق نہیں دیا جائے گا۔

ایرانی افواج کے مطابق دیگر بحری جہازوں کو ایران کے قواعد و ضوابط کے تحت گزرنے کی اجازت ہوگی۔ ایران آبنائے ہرمز کے کنٹرول کے لیے سخت نظام نافذ کرے گا، حتیٰ کہ جنگ کے بعد بھی۔

ایرانی میڈیا کے مطابق امریکا پر تنقید کرتے ہوئے ایرانی افواج نے بین الاقوامی پانیوں میں پابندیوں کو سمندری قزاقی قرار دیا ہے۔ ایران نے خبردار کیا کہ اس کی بندرگاہوں کو خطرہ لاحق ہونے پر کوئی بھی بندرگاہ محفوظ نہیں رہے گی۔

واضح رہے کہ امریکی صدر ڈونلڈ ٹرمپ نے مذاکرات کی ناکامی کے بعد آبنائے ہرمز کی ناکہ بندی کا اعلان کرتے ہوئے سخت کارروائی کی دھمکی دی تھی۔ امریکی بحریہ آبنائے ہرمز میں جہازوں کی ناکہ بندی شروع کرے گی۔