واشنگٹن: (رائیٹ ناوٴ نیوز) امریکی صدر ڈونلڈ ٹرمپ نے تازہ بیان میں میڈیا پر سخت تنقید کی ہے اور ایران کی جنگ میں پسپائی کا دعویٰ کیا ہے۔ ان کا کہنا ہے کہ بعض میڈیا ادارے ایران کو برتری میں دکھا رہے ہیں جبکہ تہران نے عسکری نقصان اٹھایا ہے۔

صدر ٹرمپ نے دعویٰ کیا ہے کہ ایران کی بحریہ، فضائیہ، فضائی دفاعی نظام، ریڈار اور میزائل و ڈرون تنصیبات بڑی حد تک تباہ ہو چکی ہیں۔ مزید کہا کہ ایران کی بارودی سرنگیں بچھانے والی 28 کشتیاں سمندر کی تہہ میں جا چکی ہیں۔

امریکی صدر کے مطابق امریکا نے آبنائے ہرمز کو صاف کرنے کا عمل شروع کر دیا ہے تاکہ عالمی جہاز رانی بحال ہو سکے۔ انہوں نے کہا کہ یہ اقدام دنیا کے کئی ممالک بشمول چین، جاپان، جنوبی کوریا، فرانس اور جرمنی کے لیے کیا جا رہا ہے۔

ٹرمپ نے مزید کہا کہ مختلف ممالک کے خالی تیل بردار جہاز امریکا کا رخ کر رہے ہیں تاکہ وہاں سے تیل لادا جا سکے۔ ان کے بیان کے وقت خطے میں کشیدگی، جہاز رانی کے خدشات اور جنگ بندی کی سفارتی سرگرمیاں توجہ کا مرکز بنی ہوئی ہیں۔

واضح رہے کہ ٹرمپ کے یہ سخت دعوے ایک ایسے وقت سامنے آئے ہیں جب امریکی مؤقف، عسکری بیانیے اور سفارتی رابطوں کے درمیان تضاد پر سوالات اٹھ رہے ہیں۔ واشنگٹن جنگ بندی کی بات کر رہا ہے، جبکہ ٹرمپ ایران کے عسکری انہدام کا دعویٰ کر رہے ہیں۔