اسلام آباد: (رائیٹ ناوٴ نیوز) اسلام آباد میں غیرملکی وفود کی آمد کے باعث میٹروبس سروس محدود کر دی گئی ہے۔ یہ اقدام امریکا اور ایران کے درمیان مذاکرات سے پہلے لیا گیا ہے۔

میٹرو حکام کا کہنا ہے کہ میٹروبس سروس صدر سٹیشن سے پمز تک فعال ہے، جبکہ پمز سٹیشن سے پاک سیکرٹریٹ تک بس سروس بند کر دی گئی ہے۔ حکام کے مطابق ضلعی انتظامیہ کی ہدایات پر یہ فیصلہ کیا گیا ہے۔

اسلام آباد میں غیرملکی وفود کی آمد کے باعث خصوصی ٹریفک پلان بھی نافذ کیا گیا ہے۔ ٹریفک پولیس کے مطابق جی ٹی روڈ پشاور سے راولپنڈی آنے والے افراد کو ٹیکسلا موٹروے، چکری چک بیلی روڈ، اور روات استعمال کرنے کی ہدایت دی گئی ہے۔

ٹریفک پولیس نے مارگلہ روڈ سے راولپنڈی جانے والوں کو نائنتھ ایونیو اور راولپنڈی سے اسلام آباد آنے والوں کو مری روڈ کے ذریعے نائنتھ ایونیو استعمال کرنے کی ہدایت دی ہے۔ فیصل ایونیو سے زیرو پوائنٹ جانے والی ٹریفک کو نائنتھ ایونیو کی طرف موڑا جائے گا۔

واضح رہے کہ آج اور کل اسلام آباد میں ہر قسم کی ہیوی ٹریفک کے داخلے پر بھی پابندی عائد کی گئی ہے تاکہ ٹریفک کی روانی برقرار رکھی جا سکے۔