تل ابیب: (رائیٹ ناوٴ نیوز) اسرائیلی وزیر اعظم نیتن یاہو نے اعلان کیا ہے کہ اسرائیل ایران سے دوبارہ جنگ کے لیے مکمل تیار ہے۔ یہ بیان ایک ایسے وقت میں آیا ہے جب واشنگٹن اور تہران کے درمیان دو ہفتوں کی جنگ بندی پر اتفاق ہوا تھا۔

نیتن یاہو نے بیان میں کہا کہ اسرائیل کے پاس مزید اہداف ہیں جنہیں معاہدے یا جنگ دوبارہ شروع کرکے حاصل کیا جائے گا۔ انہوں نے واضح کیا کہ ایران کے ساتھ جنگ بندی میں حزب اللہ شامل نہیں ہے۔

نیتن یاہو نے مزید کہا کہ اسرائیل کی انگلیاں ٹریگر پر ہیں، اور افزودہ یورینیم ایران سے ختم کر دیا جائے گا، چاہے معاہدے سے یا طاقت سے۔

وزیر اعظم نے کہا کہ جنگ بندی کا معاہدہ اسرائیل کے مکمل تعاون سے ہوا، لیکن یہ جنگ کا اختتام نہیں ہے۔ اس بیان نے خطے میں مزید کشیدگی کو ہوا دی ہے۔

واضح رہے کہ یہ اعلان ایران اور امریکا کے درمیان ہونے والی جنگ بندی کے معاہدے کے بعد سامنے آیا۔ عباس عراقچی نے کہا کہ جنگ بندی کی شرائط واضح اور دوٹوک ہیں، اور دونوں چیزیں ایک ساتھ ممکن نہیں۔