سیالکوٹ: (رائیٹ ناوٴ نیوز) وزیر دفاع خواجہ آصف نے سیالکوٹ میں ترقیاتی منصوبوں کی افتتاحی تقریب سے خطاب کرتے ہوئے کہا کہ ایران اسرائیل جنگ کے اثرات کا پاکستان کو طویل عرصے تک سامنا کرنا پڑے گا۔ انہوں نے کہا کہ ان اثرات سے نمٹنے کے لیے کئی کھرب روپے کی ضرورت ہوگی۔

خواجہ آصف نے بھارت کے حوالے سے کہا کہ بھارت بوکھلاہٹ کا شکار ہے اور فالس فلیگ (False Flag) آپریشن کرنے کے موڈ میں ہے۔ اگر ایسا ہوا تو پاکستان بھرپور جواب دے گا۔

حکومت کی کوشش ہے کہ شہر کے مسائل حل کیے جائیں۔ انہوں نے کہا کہ گزشتہ سال سیلاب نے تباہی مچائی تھی، جس کے بعد شہر کو سیلابی پانی سے محفوظ رکھنے کے لیے اربوں روپے خرچ کیے جا رہے ہیں۔

خواجہ آصف نے بتایا کہ شہر میں تاریخی مقامات کی بحالی کے منصوبے جاری ہیں، جن میں اقبال منزل اور قلعہ شامل ہیں۔ قلعے کے اطراف میں تجاوزات کے خاتمے کے لیے اقدامات کیے جا رہے ہیں۔

واضح رہے کہ ایران اور اسرائیل کے درمیان جاری کشیدگی خطے کے استحکام کے لیے خطرہ ہے۔ پاکستان نے ہمیشہ خطے میں امن کی کوششوں کی حمایت کی ہے۔