واشنگٹن: (رائیٹ ناوٴ نیوز)۔ امریکی صدر ڈونلڈ ٹرمپ نے ایران کے خلاف جاری جنگ میں شدت لانے کا عندیہ دیا ہے۔ انہوں نے کہا ہے کہ آئندہ چند ہفتے انتہائی اہم ہوں گے اور فوجی کارروائیاں مزید تیز کی جا سکتی ہیں۔

ٹرمپ نے امریکی عوام سے خطاب میں بتایا کہ امریکی افواج نے گزشتہ ایک ماہ کے دوران ایران کے اہم عسکری ڈھانچے کو شدید نقصان پہنچایا ہے۔ ان کے مطابق آپریشن اپنے اہم مراحل طے کر چکا ہے اور اب اسے منطقی انجام تک پہنچایا جائے گا۔

امریکی صدر نے یہ بھی کہا کہ ایران کی جانب سے ممکنہ خطرات میں نمایاں کمی آئی ہے۔ تاہم مکمل اہداف کے حصول تک کارروائیاں جاری رہیں گی۔ انہوں نے ایران کی توانائی تنصیبات کو بھی ممکنہ ہدف قرار دیا ہے۔

یاد رہے کہ ٹرمپ نے ایرانی حکومت پر سنگین الزامات عائد کرتے ہوئے کہا کہ گزشتہ دہائیوں میں عوامی مظاہروں کو طاقت سے کچلا گیا ہے۔ انہوں نے مشرق وسطیٰ کے اتحادی ممالک کے تحفظ کے عزم کا بھی اعادہ کیا ہے۔

واضح رہے کہ تیل کی عالمی منڈیوں پر بات کرتے ہوئے ٹرمپ نے کہا کہ امریکا اب توانائی کے شعبے میں خود کفیل ہو چکا ہے، اور کشیدگی کے باعث تیل کی قیمتوں میں اتار چڑھاؤ دیکھنے میں آیا ہے۔