اسلام آباد: (رائیٹ ناوٴ نیوز) وزیراعظم شہباز شریف نے سعودی مسلح افواج کے چیف آف جنرل اسٹاف جنرل الرویلی کا استقبال کیا۔ ملاقات میں دونوں رہنماؤں نے پاک سعودی تعلقات کو مزید مضبوط بنانے کا عزم ظاہر کیا۔

وزیراعظم نے سعودی قیادت کے لیے نیک خواہشات کا اظہار کرتے ہوئے دونوں ممالک کے تعلقات کو مشترکہ عقیدے اور باہمی اعتماد پر مبنی قرار دیا۔ انہوں نے ریاض کے اپنے دوروں کا ذکر کرتے ہوئے سعودی عرب کی غیر متزلزل حمایت کو سراہا۔

جنرل الرویلی نے سعودی قیادت کی جانب سے وزیراعظم اور پاکستانی عوام کے لیے تہنیتی پیغام پہنچایا اور دفاعی و تزویراتی شراکت داری کو نئی بلندیوں تک پہنچانے کی خواہش کا اعادہ کیا۔

ملاقات میں نائب وزیراعظم اسحاق ڈار، چیئرمین جوائنٹ چیفس آف اسٹاف کمیٹی فیلڈ مارشل سید عاصم منیر، وزیر دفاع خواجہ آصف اور دیگر اعلیٰ حکام بھی موجود تھے۔ دونوں رہنماؤں نے دوطرفہ تعاون، سیکیورٹی اور دفاعی شعبے میں مشترکہ حکمت عملی پر تبادلہ خیال کیا۔