واشنگٹن: (رائیٹ ناوٴ نیوز) امریکی صدر ڈونلڈ ٹرمپ نے اسپین کو تنبیہ کی ہے کہ اسرائیل سے سفیر کی واپسی پر اسے قیمت چکانی ہوگی۔ انہوں نے کہا کہ امریکی فوج دنیا کی سب سے طاقتور فوج ہے اور ایران کی عسکری صلاحیتوں کو شدید نقصان پہنچایا گیا ہے۔

ٹرمپ نے ایران کی فوجی کارروائیوں پر بات کرتے ہوئے بتایا کہ ایرانی نیوی، ایئر فورس، اینٹی ایئرکرافٹ سسٹمز اور ریڈارز کو بھاری نقصان پہنچایا گیا ہے اور کارروائی ابھی مکمل نہیں ہوئی۔

اسپین کے حوالے سے ٹرمپ نے کہا کہ اسپین کے عوام اچھے ہیں لیکن ان کی حکومت کے اقدامات غلط ہیں اور اس کی قیمت چکانی ہوگی۔ اسپین نے اسرائیل میں اپنا سفیر مستقل طور پر واپس بلا لیا ہے جبکہ تل ابیب میں اسپین کا سفارت خانہ چارج ڈی افیئرز کے ذریعے چلایا جا رہا ہے۔

یاد رہے کہ اسپین نے اسرائیل کی بندرگاہوں اور فضائی حدود میں ہتھیار لے جانے والے جہازوں پر پابندی لگائی تھی، جسے اسرائیلی وزیر خارجہ نے یہودی مخالف قرار دیا تھا۔ اس اقدام سے دونوں ممالک کے تعلقات میں کشیدگی مزید بڑھ گئی ہے۔