نیویارک: (رائیٹ ناوٴ نیوز) اقوام متحدہ میں چین کے مستقل مندوب فو کونگ نے کہا ہے کہ افغانستان میں سرگرم دہشتگرد تنظیمیں خطے کے امن و استحکام کے لیے شدید خطرہ ہیں۔ انہوں نے کہا کہ ان دہشتگرد کارروائیوں سے پڑوسی ممالک اور چینی شہریوں کو بھی خطرہ لاحق ہے۔

فو کونگ نے طالبان حکومت پر زور دیا کہ وہ اپنی سرزمین پر موجود تمام دہشتگرد عناصر کا مکمل خاتمہ کرے۔

اقوام متحدہ میں پاکستانی مندوب عاصم افتخار نے بھارت اور افغان نمائندوں کے بیانات پر جواب دیتے ہوئے کہا کہ پاکستان نے شواہد فراہم کیے ہیں کہ بھارت دہشتگرد گروپوں کے ساتھ مل کر پاکستان میں حملوں کی منصوبہ بندی میں ملوث ہے۔ انہوں نے مزید کہا کہ بھارت افغان سرزمین سے پاکستان میں دہشت گردی بھڑکانے کی اپنی پالیسی ترک کرے۔

عاصم افتخار نے کہا کہ افغانستان کے نام نہاد نمائندے حقیقت میں کسی کی نمائندگی نہیں کرتے، یہ صرف اپنے آپ کی نمائندگی کرتے ہیں۔