اسلام آباد: (رائیٹ ناوٴ نیوز) وفاقی کابینہ نے منگل کے روز قومی بھنگ کنٹرول اور ریگولیٹری پالیسی 2025 کی منظوری دے دی، جس کے تحت بھنگ کی کاشت کو دواسازی اور ٹیکسٹائل کے شعبوں میں پودوں پر مبنی وسائل کے منظم استعمال کے لیے باقاعدہ فریم ورک میں لایا جائے گا۔ حکومتی ذرائع کے مطابق اس پالیسی کا مقصد غیر قانونی استعمال کی روک تھام کے ساتھ ساتھ صنعتی اور طبی مقاصد کے لیے ریگولیٹڈ پیداوار کو فروغ دینا ہے۔

وزیر اعظم شہباز شریف کی صدارت میں ہونے والے وفاقی کابینہ کے خصوصی اجلاس میں آف گرڈ پاور پلانٹس لیوی ایکٹ 2025 کی توسیع کی بھی منظوری دی گئی۔ اس توسیع کے تحت تیسرے فریق کے ذریعے کیپٹیو پاور پلانٹس کو گیس کی فروخت شامل کی گئی ہے، جسے توانائی کے شعبے میں اصلاحات کے تسلسل کا حصہ قرار دیا گیا۔

اجلاس میں پاکستان انٹرنیشنل ایئرلائنز (پی آئی اے) کی نجکاری سمیت متعدد اہم پالیسی اور قانون سازی کے اقدامات کی بھی منظوری دی گئی۔ حکومت کا مؤقف ہے کہ پی آئی اے کی نجکاری کا مقصد ادارے کے مالی بوجھ میں کمی اور آپریشنل کارکردگی میں بہتری لانا ہے۔

وفاقی کابینہ نے پبلک پروکیورمنٹ ریگولیٹری اتھارٹی آرڈیننس 2002 میں ترامیم کی منظوری بھی دی۔ ان ترامیم کا مقصد عوامی ٹینڈرنگ اور سرکاری خریداری کے نظام کو جدید تقاضوں سے ہم آہنگ کرنا اور شفافیت کو مزید بہتر بنانا ہے۔

کابینہ نے نیشنل یونیورسٹی فار سیکیورٹی سائنسز اسلام آباد بل 2025 کی منسوخی کی منظوری دی، جبکہ قومی اسمبلی میں نجی اراکین کے بلوں اور دیگر قانون سازی پر مؤثر مشاورت کے لیے ایک خصوصی کمیٹی تشکیل دینے کا فیصلہ بھی کیا گیا۔

وزارت داخلہ کی سفارش پر کابینہ نے پاکستانی شہریوں کے بیرون ملک سفر کو سہل بنانے کے لیے ویزا کلیئرنس سسٹم کی منظوری دی۔ حکام کے مطابق یہ نظام ویزا کے حصول کے لیے شفاف، محفوظ اور مربوط طریقہ کار فراہم کرے گا۔

کابینہ نے کابینہ کمیٹی برائے قانون سازی کے 20 اکتوبر، 5 نومبر اور 21 نومبر کو ہونے والے اجلاسوں کے فیصلوں اور اقتصادی رابطہ کمیٹی کے 18 دسمبر کے اجلاس میں کیے گئے فیصلوں کی بھی توثیق کر دی۔

وزیراعظم نے اپنے اختتامی کلمات میں کہا کہ حکومت کے تمام فیصلوں کی بنیاد قومی مفاد ہے، خاص طور پر معاشی اصلاحات، سیاسی استحکام اور عوامی اعتماد کے معاملات میں۔ انہوں نے انڈر 19 کرکٹ چیمپئن شپ میں پاکستان کی فتح پر قوم کو مبارکباد دی اور اسے ملک کے لیے فخر کا لمحہ قرار دیا۔

وزیراعظم نے سعودی عرب میں فیلڈ مارشل عاصم منیر کو کنگ عبدالعزیز ایوارڈ دیے جانے کا حوالہ دیتے ہوئے کہا کہ یہ اعزاز کسی ایک فرد کا نہیں بلکہ پوری قوم کی عزت کی علامت ہے۔