اسلام آباد: (رائیٹ ناوٴ نیوز) چیئرمین تحریک انصاف بیرسٹر گوہر نے کہا ہے کہ جمہوریت کی بقا کے لیے سب کو مل کر بیٹھنا ہوگا۔ ان کا بیان تحریکِ تحفظِ آئینِ پاکستان کی دو روزہ قومی کانفرنس کے بعد جاری کردہ مشترکہ اعلامیہ میں سامنے آیا۔

اعلامیہ میں بیرسٹر گوہر نے کہا کہ ملک میں آئین اور عدلیہ کی حیثیت کمزور ہوگئی ہے اور جو ججز کھڑے ہوسکتے تھے وہ چلے گئے ہیں۔ انہوں نے مزید کہا کہ ہمیں دیوار سے لگانے کی کوشش کی جارہی ہے لیکن جمہوریت کی بقا کے لیے مذاکرات ضروری ہیں۔

بیرسٹر گوہر نے کہا کہ عدالتوں سے انصاف کی امید کم ہوگئی ہے اور جو اہداف حاصل کرنے تھے وہ دو سال میں حاصل نہیں کرسکے، تاہم ہم جمہوریت کو بچانے کی کوشش کر رہے ہیں۔

انہوں نے اپنی گفتگو میں یہ بھی کہا کہ ملک، فوج اور مسائل کے حل کے لیے راستہ نکالنا ضروری ہے۔