راولپنڈی: (رائیٹ ناوٴ نیوز) بدھ کی صبح پولیس نے پی ٹی آئی کے مظاہرین کو منتشر کرنے کے لیےواٹر کینن کا استعمال کیا گیاجو اڈیالہ جیل کے قریب دھرنا دے رہے تھے۔

عمران خان کی بہنیں اور پارٹی کارکنان فیکٹری ناکہ پر دھرنا دیے بیٹھے تھے، ان کا مطالبہ تھا کہ انہیں پی ٹی آئی کے بانی سے ملاقات کرنے دی جائے جو عدالت کے حکم کے مطابق ہفتے میں دو بار ہونی چاہیے۔

اسلام آباد ہائی کورٹ کے 24 مارچ کے حکم کے تحت ملاقاتیں منگل اور جمعرات کو ہونی تھیں، مگر پی ٹی آئی کا دعویٰ ہے کہ اس حکم پر عمل نہیں ہورہا۔

پولیس نے بدھ کی صبح دو بجے آپریشن شروع کیا اورواٹر کینن کے ذریعے مظاہرین کو منتشر کیا۔ کچھ کارکنان کو گرفتار بھی کیا گیا مگر تعداد کی تصدیق نہیں ہوسکی۔

مجلس وحدت المسلمین کے رہنما علامہ راجہ ناصر نے مظاہرین کے خلاف ظالمانہ سلوک کی مذمت کی۔ پی ٹی آئی نے سوشل میڈیا پر کہا کہ یہ اقدامات آئین، قانون کی حکمرانی اور عدلیہ کے اختیار پر براہِ راست حملہ ہیں۔

پارٹی نے کہا کہ پنجاب پولیس نے حکومت کے کہنے پر عمران خان کی بہنوں، علامہ راجہ ناصر عباس، دیگر پارٹی رہنماؤں اور مظاہرین پر کیمیکل ملا پانی استعمال کیا۔

پی ٹی آئی نے کہا کہ اس طرح کے اقدامات حکومت کی گھبراہٹ اور اخلاقی دیوالیہ پن کو ظاہر کرتے ہیں اور یہ ظلم زیادہ دیر نہیں چل سکتا۔