صادق آباد: (رائیٹ ناوٴ نیوز) صادق آباد کے قریب جمالدین والی ائرپورٹ کے پاس شدید دھند کے باعث ایک بس الٹنے سے تین افراد جاں بحق اور پندرہ زخمی ہوگئے۔ دھند کی شدت کے باعث متعدد موٹرویز کو بند کر دیا گیا ہے۔

ریسکیو ٹیمیں حادثے کے فوراً بعد موقع پر پہنچ گئیں اور جاں بحق افراد کی لاشوں اور زخمیوں کو قریبی اسپتال منتقل کیا، جہاں انہیں طبی امداد فراہم کی جا رہی ہے۔ حادثے کی وجہ حدِ نگاہ کا کم ہونا بتایا گیا ہے۔

پنجاب کے مختلف علاقوں میں شدید دھند کی وجہ سے نظامِ زندگی متاثر ہوا ہے اور موٹروے پولیس نے حفاظتی اقدامات کے تحت کئی موٹرویز کو بند کر دیا ہے۔

موٹروے پولیس کے ترجمان کے مطابق ایم تھری، ایم فور، اور ایم فائیو موٹرویز کے کئی حصے بند ہیں تاکہ عوام کے جان و مال کا تحفظ ممکن بنایا جا سکے۔

موٹروے پولیس نے شہریوں کو غیر ضروری سفر سے گریز کرنے اور دن کے اوقات میں سفر کو ترجیح دینے کی ہدایت کی ہے۔ ڈرائیوروں کو فوگ لائٹس کے استعمال اور لین ڈسپلن پر عمل کرنے کی ہدایت دی گئی ہے۔

محکمہ موسمیات کے مطابق ملک کے بیشتر علاقوں میں خشک سردی جاری رہے گی جبکہ بالائی علاقوں میں ہلکی بارش کا امکان ہے۔ طبی ماہرین نے سرد موسم کے باعث احتیاطی تدابیر اختیار کرنے کی تاکید کی ہے۔