اسلام آباد: (رائیٹ ناؤ نیوز) وزیراعظم شہباز شریف نے پمز اسپتال آتشزدگی کے واقعے میں ملوث اہلکاروں کے خلاف کارروائی کا حکم دیا ہے۔ انہوں نے کرغزستان سے واپسی پر فوری طور پر وزارت صحت کا ہنگامی اجلاس طلب کیا۔

اجلاس میں وزیر صحت سید مصطفیٰ کمال اور دیگر اعلیٰ حکام نے شرکت کی۔ وزیراعظم کو آتشزدگی کی تحقیقات اور وزارت صحت کے امور پر بریفنگ دی گئی۔ وزیراعظم نے اسپتال کی بہتری کے لیے فوری اقدامات کا حکم دیا۔

وزیراعظم نے وزیر صحت کو ہدایت کی کہ وہ پمز اسپتال میں اپنی ذاتی موجودگی یقینی بنائیں۔ انہوں نے علاج معالجے کی سہولیات بہتر بنانے اور حفاظتی اقدامات کے نفاذ کی ہدایت دی۔

پمز آتشزدگی کی وجوہات ابھی تک واضح نہیں ہو سکیں۔ پارلیمانی کمیٹی نے واقعے کی وجوہات جاننے میں ناکامی کا انکشاف کیا ہے۔ مختلف حکام نے آگ کی ممکنہ وجوہات پر متضاد بیانات دیے ہیں۔

واضح رہے کہ اسلام آباد کے صحت کے نظام میں سنگین بے ضابطگیوں کی نشاندہی کی گئی ہے۔ قومی اسمبلی کی کمیٹی نے وزیراعظم کو اسپتالوں کی بدانتظامی اور کرپشن پر مبنی رپورٹ پیش کی ہے۔