تہران: (رائیٹ ناؤ نیوز) ایران کے وزیر صحت محمد رضا ظفر قندی نے بتایا ہے کہ امریکی حملوں میں 19 افراد شہید اور 108 زخمی ہوئے ہیں۔ یہ حملے پیر اور منگل کی درمیانی شب ایران کے مختلف صوبوں میں ہوئے۔

حملوں کے نتیجے میں ایک خاتون اور ایک بچے سمیت 5 افراد شہید اور 65 زخمی ہوئے ہیں۔ ان افراد پر حملہ اس وقت ہوا جب وہ ایک شادی کی تقریب میں شریک تھے۔ یہ حملے 40 روزہ جنگ کے بعد امریکا کے شدید ترین حملوں میں سے ایک سمجھے جا رہے ہیں۔

ہرمزگان یونیورسٹی آف میڈیکل سائنسز کے صدر پژمان شاہ روخی نے بتایا کہ سیرک کے پہاڑی علاقے میں 6 افراد انتہائی نگہداشت کے وارڈ میں ہیں جبکہ 26 سرجیکل وارڈز میں زیر علاج ہیں۔

خوزستان صوبے میں اہواز اور آغا جاری کے مختلف مقامات پر حملوں میں 7 افراد جاں بحق اور 8 زخمی ہوئے ہیں۔ جاں بحق ہونے والوں میں عوامی سکیورٹی فورسز کا ایک رکن بھی شامل ہے۔

یاد رہے کہ پاسدارانِ انقلاب نے تصدیق کی ہے کہ صوبہ کرمانشاہ میں آئی آر جی سی کی ایرو اسپیس فورس کے چار اہلکار شہید ہوئے ہیں اور لاوان جزیرے پر بسیج فورسز کے تین اہلکار بھی شہید ہوئے ہیں۔