نیویارک: (رائیٹ ناؤ نیوز) اوپن اے آئی نے 18 سال سے کم عمر صارفین کے لیے چیٹ جی پی ٹی میں نئے حفاظتی اقدامات متعارف کرائے ہیں۔ ان اقدامات کا مقصد نوجوانوں کو مصنوعی ذہانت کے حد سے زیادہ انسانی تاثر اور غیر صحت مند استعمال سے بچانا ہے۔

نئے ‘چیٹ جی پی ٹی فار ٹینز’ تجربے کے تحت نوجوان صارفین کو چیٹ بوٹ کی انسان جیسی آواز کو بند کرنے کی سہولت دی گئی ہے۔ انہیں وقفے لینے کی یاد دہانیاں بھی دی جائیں گی تاکہ طویل استعمال سے بچا جا سکے۔

کمپنی نے بتایا کہ 13 سے 17 سال کی عمر کے صارفین کو خودکار طور پر نوعمر اکاؤنٹ میں شامل کیا جائے گا۔ 18 سال سے کم عمر کے صارفین کو بھی یہی محفوظ تجربہ فراہم کیا جائے گا، جبکہ 13 سال سے کم عمر بچوں کے لیے دستیاب نہیں ہے۔

اوپن اے آئی نے واضح کیا کہ یہ اقدامات کسی مخصوص واقعے کے ردعمل میں نہیں کیے گئے، بلکہ مصنوعی ذہانت کے نظاموں سے متعلق خدشات کے پیش نظر حفاظتی اقدامات بڑھائے جا رہے ہیں۔

یاد رہے کہ نوجوانوں کی تعلیم کے لیے چیٹ جی پی ٹی میں اسٹڈی موڈ کو مزید بہتر بنایا گیا ہے، جس میں طلبہ کو براہ راست جواب دینے کے بجائے سوالات اور مرحلہ وار رہنمائی فراہم کی جاتی ہے۔