ایپل کا پہلا فولڈ ایبل آئی فون ستمبر میں متعارف ہوگا، ٹچ آئی ڈی اور ٹیلی فوٹو کیمرہ نہیں ہوگا۔ سام سنگ اور گوگل کے مقابلے میں ایپل کی دیر سے انٹری اہم ہوگی۔
کیپرٹینو: (رائیٹ ناؤ نیوز) ایپل نے اپنا پہلا فولڈ ایبل آئی فون متعارف کرانے کی تیاری کر لی ہے۔ اطلاعات کے مطابق اس میں فیس آئی ڈی کے بجائے ٹچ آئی ڈی اور ٹیلی فوٹو کیمرہ نہیں ہوگا۔
بلومبرگ کی رپورٹ کے مطابق، یہ آئی فون ستمبر میں متعارف کرایا جائے گا۔ اس کی قیمت 2,000 ڈالر سے زائد ہوگی، جو پاکستانی کرنسی میں تقریباً 5 لاکھ 55 ہزار روپے بنتی ہے۔
ایپل کے فولڈ ایبل آئی فون کا ڈیزائن منفرد ہوگا، جس میں مضبوط قبضہ اور بڑی اندرونی اسکرین شامل ہوگی۔ فون کی اندرونی اسکرین ویڈیوز دیکھنے اور گیمز کھیلنے کے لیے زیادہ سہولت فراہم کرے گی۔
یہ تبدیلیاں ایپل کے لیے بڑی اہمیت رکھتی ہیں، کیونکہ سام سنگ اور گوگل پہلے ہی فولڈ ایبل فونز مارکیٹ میں لا چکے ہیں۔ ایپل کی اس شعبے میں آمد سے فولڈ ایبل فونز کی مقبولیت میں اضافہ ہونے کا امکان ہے۔
واضح رہے کہ ایپل عام طور پر ستمبر کے پہلے یا دوسرے ہفتے میں اپنا بڑا آئی فون ایونٹ منعقد کرتا ہے۔ اس بار آئی فون 18 پرو سیریز اور ایپل واچ کے نئے ماڈلز کی بھی رونمائی متوقع ہے۔
