سان ڈیاگو: (رائیٹ ناؤ نیوز) کیلیفورنیا کے شہر سان ڈیاگو میں ایک نوجوان نے سمندری بلی (سیل) پر تشدد کرنے کا اعتراف کرلیا ہے۔ یہ واقعہ امریکا کے وفاقی قانون ‘مرین میمل پروٹیکشن ایکٹ’ کے تحت جرم ہے۔

عدالت میں 18 سالہ ٹائلر میول نے اس جرم کا اعتراف کیا۔ ویڈیو میں انہیں سان ڈیاگو کے ساحل پر سیل کو لاتیں مارتے دیکھا گیا تھا۔

ٹائلر نے عدالت میں بتایا کہ اس نے 22 جولائی کی رات سیل پر حملہ کیا۔ امریکی حکام کے مطابق یہ عمل نہ صرف غیر قانونی بلکہ جانوروں کی فلاح کے لیے بھی خطرناک ہے۔

سیل کو تحفظ دینے والے قانون کی خلاف ورزی پر ایک سال قید اور ایک لاکھ ڈالر جرمانے کی سزا ہے۔ میڈیا رپورٹس کے مطابق جج اس اعتراف کو مدنظر رکھتے ہوئے کم سزا بھی دے سکتے ہیں۔

واضح رہے کہ اس سے پہلے بھی سیاحوں کی جانب سے سمندری حیات پر حملوں کے واقعات سامنے آچکے ہیں، جیسے کہ ہوائی میں سیل پر پتھر پھینکنے کا واقعہ۔