اسلام آباد: (رائیٹ ناؤ نیوز) پاکستان کے جشن آزادی کے موقع پر نادرا نے عوام کے لیے نئی سہولت متعارف کرائی ہے۔ نادرا نے کیو آر کوڈ والا نیا قومی شناختی کارڈ پیش کیا ہے، جسے پاکستان میں تیار کیا گیا ہے۔

اس شناختی کارڈ میں چِپ کا استعمال نہیں کیا گیا، بلکہ کیو آر کوڈ کے ذریعے تصدیق کی جائے گی۔ یہ تصدیق عام اسمارٹ فون سے بھی ممکن ہوگی، جو خود انحصاری کی جانب ایک اہم قدم ہے۔

نادرا کا کہنا ہے کہ پاک آئی ڈی موبائل ایپ کے ذریعے کیو آر کوڈ اسکین کر کے شناخت کی تصدیق کی جا سکے گی۔ اس سے شناختی عمل کو مزید آسان اور تیز بنایا جا سکے گا۔

کیو آر کوڈ میں کارڈ ہولڈر کی تصویر اور شناختی معلومات شامل ہیں۔ اس سے نام، پتہ اور دیگر معلومات میں غلطیوں کے اندراج میں کمی لانے میں مدد ملے گی۔

یاد رہے کہ نادرا کی جانب سے یہ اقدام شناختی دستاویزات کی تصدیق کو مؤثر بنانے کے لیے کیا گیا ہے، جو عوام کے لیے بڑی سہولت ثابت ہوگا۔