پاکستان کا 79 واں یوم آزادی شایان شان سے منایا گیا، مختلف شہروں میں تقاریب کا انعقاد ہوا، بانیان پاکستان کو خراج عقیدت پیش کیا گیا۔
اسلام آباد: (رائیٹ ناؤ نیوز) پاکستان کا 79 واں یوم آزادی آج ملک بھر میں شایان شان طریقے سے منایا گیا۔ اس موقع پر مختلف شہروں میں خصوصی تقاریب کا اہتمام کیا گیا۔
یوم آزادی کا آغاز توپوں کی سلامی سے ہوا، جبکہ نماز فجر کے بعد ملک کی خوشحالی اور استحکام کے لیے خصوصی دعائیں کی گئیں۔ مختلف مساجد میں کشمیریوں کی جدوجہد کی کامیابی کے لیے بھی دعائیں کی گئیں۔
مزار قائد پر گارڈز تبدیلی کی پروقار تقریب ہوئی، جہاں پاکستان نیول اکیڈمی کے دستے نے چارج سنبھالا۔ تقریب میں کمانڈنٹ ریئر ایڈمرل محمد عمیر مہمان خصوصی تھے۔
آرمی چیف اور سروسز چیفس نے قوم کو مبارکباد دی اور بانیان پاکستان کو خراج عقیدت پیش کیا۔ مسلح افواج نے شہداء کی قربانیوں کو یاد کیا اور ملکی ترقی کے عزم کا اعادہ کیا۔
یاد رہے کہ پاکستان کا قیام 1947 میں ہوا تھا اور آزادی کی یہ نعمت ہمارے بزرگوں کی قربانیوں کا نتیجہ ہے، جسے آج بھی یاد رکھا جاتا ہے۔
