اسلام آباد: (رائیٹ ناؤ نیوز) پاکستان پیپلز پارٹی کی نائب صدر سینیٹر شیری رحمان نے آزاد کشمیر میں پولنگ کے آغاز میں تاخیر پر تحفظات کا اظہار کیا ہے۔ انہوں نے کہا کہ کچھ پولنگ سٹیشنز پر پیپلز پارٹی کے پولنگ ایجنٹس کو روکا گیا ہے۔

شیری رحمان نے بتایا کہ ایل اے 16 اور ایل اے 15 کے مختلف پولنگ سٹیشنز پر بروقت پولنگ شروع نہیں ہوئی۔ انہوں نے مطالبہ کیا کہ ووٹرز کو حقِ رائے دہی کا مکمل موقع فراہم کیا جائے۔

انہوں نے مزید کہا کہ پیپلز پارٹی کے ایجنٹس کو بعض پولنگ سٹیشنز میں داخلے سے روکنا شفافیت پر سوال اٹھاتا ہے۔ انہوں نے الیکشن کمیشن کو فوری مداخلت کا مطالبہ کیا ہے۔

شیری رحمان نے کہا کہ انتخابی عمل میں کسی بھی رکاوٹ کو نظرانداز نہیں کیا جا سکتا۔ انہوں نے کہا کہ پولنگ عملے یا سامان کی کمی کی صورت میں متبادل انتظام کیا جائے۔

یاد رہے کہ آزاد کشمیر میں انتخابات کی شفافیت کے حوالے سے ماضی میں بھی سوالات اٹھائے جاتے رہے ہیں۔ سینیٹر شیری رحمان نے قانون کے مطابق بلا رکاوٹ پولنگ یقینی بنانے کا مطالبہ کیا ہے۔