برلن: (رائیٹ ناؤ نیوز) جرمنی کی میڈیکل ٹیکنالوجی کمپنی نے اسمارٹ ٹوائلٹ سیٹ تیار کیا ہے۔ یہ سیٹ صرف 30 سیکنڈ میں دل کی دھڑکن کا معائنہ کر سکتا ہے اور بے ترتیب دھڑکن کی نشاندہی کرتا ہے۔

رپورٹ کے مطابق ‘ہارو ای کے جی سیٹ’ عام ٹوائلٹ سیٹ جیسا ہے لیکن اس میں سینسر نصب ہیں۔ یہ سینسر جسم سے برقی سگنلز حاصل کرکے 6 لیڈز پر مشتمل ای کے جی ریکارڈ کرتے ہیں اور نتائج بلوٹوتھ کے ذریعے موبائل ایپ کو بھیجتے ہیں۔

کمپنی کا کہنا ہے کہ 30 سیکنڈ کی ریکارڈنگ کے بعد موبائل ایپ دل کی دھڑکن کا تجزیہ کرتی ہے۔ ابتدائی تحقیق میں اس سیٹ کے نتائج روایتی 12 لیڈ ای کے جی سے کافی مماثلت رکھتے ہیں۔

ایٹریل فبریلیشن دل کی بے ترتیب دھڑکن کی عام قسم ہے جو فالج کے خطرے کو بڑھا سکتی ہے۔ یہی وجہ ہے کہ دل کی دھڑکن کو معمول میں ریکارڈ کرنا اس کیفیت کی نشاندہی میں اہم ہے۔

یاد رہے کہ ماہرین نے وضاحت کی ہے کہ اس ڈیوائس کے نتائج کو حتمی طبی تشخیص نہیں سمجھا جاسکتا۔ اس کی تحقیق کے نتائج ابھی آزادانہ طور پر شائع نہیں ہوئے۔