تہران: (رائیٹ ناؤ نیوز) ایران کے وزیر خارجہ عباس عراقچی نے امریکی صدر ڈونلڈ ٹرمپ کی ایرانی اثاثے ضبط کرنے کی دھمکی پر شدید ردعمل دیا ہے۔ انہوں نے کہا کہ یہ اقدام بین الاقوامی قوانین کے لیے خطرناک نظیر ہے۔

عراقچی نے سوشل میڈیا پلیٹ فارم ایکس پر کہا کہ غیر متعلقہ دعووں پر اثاثے ضبط کرنا عالمی مالیاتی نظام کے لیے سنگین نتائج پیدا کر سکتا ہے۔ اس سے بین الاقوامی قوانین متاثر ہو سکتے ہیں۔

انہوں نے مزید کہا کہ جو ممالک یا ادارے اس طرح کے اقدامات سے فائدہ اٹھانے کی کوشش کریں گے، انہیں جان لینا چاہیے کہ اگر یہ معمول بن گیا تو کوئی بھی اثاثہ محفوظ نہیں رہے گا۔

عراقچی کے مطابق ایسے اقدامات عالمی مالیاتی نظام میں بے یقینی اور قانونی تنازعات کو جنم دے سکتے ہیں، جو عالمی امن کے لیے نقصان دہ ہو سکتے ہیں۔

یاد رہے کہ ایران اور امریکا کے درمیان کشیدگی برقرار ہے اور حالیہ بیانات دونوں ممالک کے درمیان تنازعہ کو مزید بڑھا سکتے ہیں۔