واشنگٹن: (رائیٹ ناؤ نیوز) اوپن اے آئی نے امریکی حکومت کے ساتھ تعلقات بہتر بنانے کے لئے ٹرمپ انتظامیہ کو کمپنی میں پانچ فیصد حصص دینے کی تجویز دی ہے۔ یہ پیشکش مبینہ طور پر حکومتی کشیدگی کم کرنے اور مستقبل کی آئی پی او سے قبل کی گئی ہے۔

فنانشل ٹائمز کی رپورٹ کے مطابق، اوپن اے آئی نے دیگر مصنوعی ذہانت کی کمپنیوں کو بھی امریکی حکومت کو اسی نوعیت کے حصص دینے پر غور کرنے کی تجویز دی ہے۔ اینتھروپک سمیت دیگر کمپنیاں اس تجویز پر غور کر رہی ہیں۔

یہ تجویز ایسے وقت میں سامنے آئی ہے جب امریکی حکومت نے انٹیل اور ایم پی میٹیریلز میں بالترتیب 10 اور 15 فیصد حصص حاصل کیے ہیں۔ یہ پیشرفت حکومت کی سرمایہ کاری پالیسی کا حصہ ہے۔

مصنوعی ذہانت کی ممکنہ معاشی اثرات، خصوصاً ملازمتوں میں کمی کے خدشات کے باعث اوپن اے آئی کی یہ تجویز تعلقات مضبوط بنانے کی کوشش مانی جا رہی ہے۔ اس کا مقصد ریگولیٹری ماحول کو سازگار رکھنا بھی ہے۔

یاد رہے کہ اس رپورٹ پر اوپن اے آئی یا امریکی حکومت کی جانب سے باضابطہ ردعمل تاحال سامنے نہیں آیا ہے۔