پشاور: (رائیٹ ناؤ نیوز) پی ڈی ایم اے نے خیبر پختونخوا کے بالائی اضلاع میں گلیشیائی جھیلوں کے پھٹنے کے خدشے کے پیش نظر الرٹ جاری کیا ہے۔ درجہ حرارت میں اضافے اور شدید گرمی کی وجہ سے گلیشیئرز کے تیزی سے پگھلنے کا امکان ہے، جس سے سیلاب اور لینڈ سلائیڈنگ کے خطرات بڑھ گئے ہیں۔

پی ڈی ایم اے نے اپر و لوئر چترال، سوات، اپر دیر، کوہستان اور مانسہرہ کی انتظامیہ کو پیشگی حفاظتی اقدامات کرنے کی ہدایات دی ہیں۔ حساس علاقوں میں حکام کو ہائی الرٹ رہنے اور صورتحال کی نگرانی جاری رکھنے کی ہدایت کی گئی ہے۔

ترجمان نے کہا کہ تمام ریسکیو ادارے اور ہنگامی عملہ ہر وقت تیار رہیں، جبکہ ضلعی انتظامیہ کو خطرے سے دوچار آبادی کو بروقت آگاہ کرنے کی ہدایت دی گئی ہے۔

پی ڈی ایم اے نے سیاحوں کو غیر ضروری سفر سے گریز کرنے اور خطرناک علاقوں سے دور رہنے کا مشورہ دیا ہے۔ عوام کو بھی بارشوں کے دوران احتیاط برتنے کی اپیل کی گئی ہے۔

واضح رہے کہ خیبر پختونخوا کے بالائی علاقے اکثر قدرتی آفات کی زد میں رہتے ہیں، اور ماضی میں بھی یہاں گلیشیائی جھیلوں کے پھٹنے سے نقصانات ہو چکے ہیں۔