لاہور: (رائیٹ ناؤ نیوز) پنجاب حکومت نے مصنوعی ذہانت (AI) کے ذریعے فنکاروں کی غیر مجاز شناخت کے استعمال پر قانون سازی کا مسودہ تیار کر لیا ہے۔ اس قانون کے تحت ڈیپ فیک اور وائس کلوننگ پر سخت سزائیں اور کروڑوں روپے تک جرمانے ہوں گے۔

پنجاب پرفارمرز ڈیجیٹل شناخت اور مصنوعی ذہانت تحفظ ایکٹ 2026 کا مسودہ تیار کر لیا گیا ہے۔ اس کے تحت AI کے ذریعے فنکاروں کی آواز یا چہرے کے غیر مجاز استعمال پر پابندی ہوگی۔

قانون کے مطابق کسی فنکار کی ڈیجیٹل شناخت کو قانونی طور پر محفوظ ملکیت کا درجہ دیا جائے گا۔ اس کے تجارتی استعمال کے لیے واضح تحریری اجازت ضروری ہوگی۔

بل میں ڈیپ فیک، وائس کلوننگ اور جعلی مواد کے استعمال کے لیے سخت قواعد تجویز کیے گئے ہیں۔ AI کے مواد میں اس کا استعمال واضح طور پر ظاہر کرنا لازم ہوگا۔

یاد رہے کہ مجوزہ قانون کی خلاف ورزی پر کروڑوں روپے جرمانے اور تین سال تک قید کی سزا ہو سکتی ہے۔ یہ قانون ڈیجیٹل دور میں فنکاروں کے حقوق کے تحفظ کی جانب ایک اہم قدم ہے۔