اسلام آباد: (رائیٹ ناؤ نیوز) پاکستان تحریک انصاف کے چیئرمین بیرسٹر گوہر نے وفاقی حکومت کے بجٹ کو آئینی مسئلہ قرار دیا ہے۔ انہوں نے پارلیمنٹ ہاؤس میں میڈیا سے گفتگو کرتے ہوئے کہا کہ دفاعی بجٹ پورا کرنا وفاق کی ذمہ داری ہے اور اسے صوبوں پر نہیں ڈالنا چاہیے۔

بیرسٹر گوہر نے مزید کہا کہ وفاقی حکومت پچھلے 4 سال میں ناکام رہی ہے، ادارہ جاتی اصلاحات نہ ہونے کی وجہ سے کاروباری طبقہ متاثر ہوا ہے۔ انہوں نے کہا کہ حکومت نے ملکی تاریخ میں سب سے زیادہ قرضے لیے ہیں۔

انہوں نے کہا کہ اٹھارویں ترمیم کے بعد صوبوں کو ان کا مکمل حصہ ملنا چاہیے اور وفاق این ایف سی پر براہ راست عمل درآمد نہیں کرسکتا۔ انہوں نے مزید کہا کہ پاکستان کا دفاع ناقابل تسخیر ہونا چاہیے۔

ذرائع کے مطابق پنجاب حکومت کی رعایت سے وفاق اپنے مالیاتی خسارے اور آئی ایم ایف اہداف کو پورا کرسکے گا۔ چاروں صوبے وفاق کو 1200 سے 1700 ارب روپے دینے پر متفق ہوگئے ہیں جو پاکستان کو درپیش اسٹریٹیجک خطرات کے پیش نظر ضروری تھے۔

واضح رہے کہ پاکستان تحریک انصاف کے چیئرمین بیرسٹر گوہر کا یہ بیان ایسے وقت میں آیا ہے جب ملک کو درپیش مالیاتی چیلنجز اور دفاعی بجٹ کے حوالے سے مختلف معاملات زیر بحث ہیں۔