اسلام آباد: (رائیٹ ناؤنیوز) وزیراعظم شہباز شریف نے کاروباری برادری سے ملاقات کے دوران ایف بی آر کو 15 جون تک تمام زیر التوا ٹیکس ریفنڈز نمٹانے کی ہدایت کی۔ یہ ملاقات ملک کے چیمبرز آف کامرس اینڈ انڈسٹری کے وفد کے ساتھ ہوئی، جس میں آئندہ بجٹ اور معیشت کی صورتحال پر بات چیت کی گئی۔

وزیراعظم نے معاشی استحکام کے لئے حکومت کی محنت کو سراہا اور صنعتی پیداوار بڑھانے کیلئے مزید سہولتوں کا وعدہ کیا۔ انہوں نے کہا کہ برآمدات پر مبنی ترقی حکومت کا اہم مشن ہے اور اس کے لیے اجتماعی کوششیں جاری رہیں گی۔

وزیراعظم نے پاکستان ریونیو آٹومیشن لمیٹڈ (پی آر اے ایل) کا دفتر کراچی منتقل کرنے کی بھی ہدایت دی تاکہ کاروباری برادری کو سہولت ہو۔ مزید برآں، انہوں نے گجرات میں پاسپورٹ آفس قائم کرنے کی منظوری بھی دی۔

واضح رہے کہ وزیراعظم نے ایس ایم ای سیکٹر کی ترقی اور الیکٹرک وہیکلز کی مقامی پیداوار بڑھانے پر زور دیا۔ وفد نے حکومت کی معاشی کوششوں اور سفارتی اقدامات کی تعریف کی۔

اجلاس میں مختلف چیمبرز کے صدور، گورنر اسٹیٹ بینک، چیئرمین ایف بی آر اور دیگر اعلیٰ حکام بھی شریک ہوئے۔