واشنگٹن: (رائیٹ ناؤ نیوز) امریکی صدر ڈونلڈ ٹرمپ نے ایران کے ساتھ مجوزہ امن معاہدے کو تبدیل کرکے تہران کو مزید سخت شرائط پر مبنی فریم ورک ارسال کیا ہے۔ امریکی میڈیا کے مطابق دونوں ممالک کے درمیان مذاکرات جاری ہیں، مگر کئی اہم نکات پر اب بھی اختلافات برقرار ہیں۔

امریکی اخبار کے مطابق ٹرمپ نے معاہدے میں ترامیم کرکے ایرانی قیادت کو دوبارہ بھیجا ہے۔ ان ترامیم کی تفصیلات سامنے نہیں آئیں۔ تاہم یہ ترامیم ایرانی اثاثوں کو منجمد حالت سے نکالنے کے امکانات پر تشویش ظاہر کرتی ہیں۔

حکام کے مطابق ٹرمپ ایران کی جانب سے امریکی تجاویز پر ردعمل میں تاخیر سے بھی نالاں ہیں۔ دونوں ممالک کے درمیان مذاکرات براہ راست نہیں بلکہ مختلف ثالثوں کے ذریعے جاری ہیں، جن میں پاکستانی حکام بھی شامل ہیں۔

یہ معاہدہ ایرانی سپریم لیڈر کی منظوری کے لیے پیش کیا جا چکا ہے، مگر رابطوں میں مشکلات کے باعث مزید تاخیر کا امکان ہے۔ حساس معاملات، جیسے ایران کے جوہری پروگرام کے مستقبل پر مذاکرات آئندہ مراحل میں ہوں گے۔

یاد رہے کہ امریکی حکام کے مطابق ٹرمپ کو امید ہے کہ معاہدہ جلد حتمی شکل اختیار کرے گا، لیکن وہ ایران کے جوہری مواد سے متعلق مزید مضبوط ضمانتیں چاہتے ہیں۔ مزید مذاکرات کا ایک اور دور شروع ہو چکا ہے۔